स्याङ्जाका सरकारी शिक्षकले आफ्ना छोरा छोरी सरकारी स्कुलमा नपढाए तलब भत्ता नपाउने

0
59

स्याङ्जाको चापाकोट नगरपालिकाका शिक्षकशिक्षिकाले आफ्ना बालबालिकालाई सरकारी विद्यालयमा नपढाएमा शिक्षकशिक्षिकाको तलब भत्ता रोक्का गर्ने निर्णय गरेको छ । स्याङ्जाको चापाकोट नगरपालिकाले शिक्षक शिक्षिकाले आफ्ना बालबालिकालाई सरकारी विद्यालयमा पढाउनुपर्ने नियम बनाएको हो ।

आइतबार बसेको नगर शिक्षा समितिको निर्णयअनुसार हामीले विशेष गरी सरकारी विद्यालयमा अध्यापनरत शिक्षक शिक्षिकाले आफ्ना बालबालिकालाई अनिवार्यरुपमा सरकारी विद्यालयमै भर्ना गर्नुपर्ने नियम पारित गरेको कुरा नगरपालिकाका प्रमुख शिव कुमार गिरीले जानकारी दिए । सरकारी स्कुलका शिक्षक शिक्षिकाले सरकारको नुनपानी खाने तर आफ्ना बालबालिका निजी विद्यालयमा पढाउने गर्नाले शिक्षाको गुणस्तरमा कमी आएको महसुस गरी यस्तो निर्णय गर्न वाध्य भएको प्रमुख गिरीको भनाई छ ।

नगरपालिकाले पारित गरेको यो नीति आगामी शैक्षिक सत्र २०७५ बाटै लागू गरिने चापाकोट नगरपालिकाले जनाएको छ । शिक्षकले आफ्ना बालबालिका आफैँ अध्यापनरत विद्यालयमा भर्ना गर्दा सन्देश राम्रो जाने र अन्य अभिभावकलाई पनि सरकारी विद्यालयतर्फ विद्यार्थी आकर्षित गर्न सकिने नगर प्रमुख गिरीले बताए ।

नगरपालिकाले चालेको यो अभियान पहिलो चरणमा विशेष गरी सरकारी शिक्षक र क्रमशः सरकारी निकायका अन्य कर्मचारीमा पनि लागू गर्ने नगर प्रमुख गिरीको भनाइ छ । सरकारी विद्यालयमा पछिल्लो समय विद्यार्थीको संख्या घट्दै गइरहेका बेला नगरपालिकाले सरकारी विद्यालयमा विद्यार्थी भर्ना अभियानका लागि प्रोत्साहन पुग्ने खालका विभिन्न नयाँ कार्यक्रम पनि ल्याउने तयारी गरेको छ ।

प्रतिक्रिया दिनुहोस